नेभिगेशन
देश

शीघ्र युवा नीति ल्याउने घोषणा, रोजगारी सिर्जनामा दत्तचित्त: मन्त्री तेजुलाल चौधरी

युवा तथा खेलकुदमन्त्री तेजुलाल चौधरीले स्वदेशमै युवाका लागि रोजगारी सिर्जना गर्ने उद्देश्यसहित केही दिनभित्रै नयाँ युवा नीति सार्वजनिक हुने घोषणा गरेका छन्। उनले युवाको सिप विकास, उद्यमशीलता प्रवर्द्धन र रोजगारी सिर्जनामा आफ्नो मन्त्रालय गम्भीरतापूर्वक काम गरिरहेको बताएका छन्।

अन्तर्राष्ट्रिय युवा दिवसको अवसरमा रिपोर्टर्स क्लब नेपालले आयोजना गरेको विशेष कार्यक्रममा बोल्दै मन्त्री चौधरीले युवालाई देश निर्माणमा अग्रसर हुन आग्रह गरे। “देशको विकास र नेतृत्वमा पुग्नेगरी सकारात्मक पहल लिनुहोस्,” भन्दै उनले तल्लो तहदेखि युवालाई सिप विकास, उद्यमशील बनाउन र रोजगारी उपलब्ध गराउन मन्त्रालय प्रतिबद्ध रहेको स्पष्ट पारे।

उनका अनुसार प्राविधिक क्षेत्रमा रोजगारी विस्तारका लागि मन्त्रालय सक्रिय रूपमा अघि बढेको छ। उद्योगपतिहरूसँग छलफल गरी युवा–मैत्री नीति तयार पारिएको र राष्ट्रिय युवा परिषद्ले स्थानीय तहहरूसँग मिलेर रोजगारी योजनाहरू अगाडि बढाएको उनले जानकारी दिए। हाल मन्त्रालयले सिप तालिम, रोजगार मेलाको आयोजना र ऋण सुविधा उपलब्ध गराइरहेको समेत उनले बताए।

मन्त्री चौधरीले युवामा स्वरोजगारको भावना जागृत गर्नुपर्ने आवश्यकता औंल्याउँदै भने, “कपाल काट्नेदेखि गहना बनाउनेसम्मका काममा विदेशीहरू भेटिन्छन्, तर हाम्रा युवाले सीप भएर पनि लाज मान्छन्। देश बनाउने भनेको युवाले नै हो, बाहिरका नागरिकले होइन।”

उनले अब देशमा आन्दोलन वा सत्ता परिवर्तनको होइन, विकास, रोजगारी र समृद्धिको खाँचो रहेको उल्लेख गरे। सरकारले यो वर्ष १ लाख १२ हजार युवालाई रोजगारी दिने लक्ष्य राखेको र सातै प्रदेश तथा स्थानीय तहसँग सहकार्य गरेर अघि बढिरहेको पनि उनले बताए।

मिडिया स्वतन्त्रताको विषयमा मन्त्री चौधरीले लोकतान्त्रिक सरकारले मिडियामाथि अंकुश लगाउने काम नगर्ने आश्वासन दिँदै, मिडिया काउन्सिल विधेयकमा कमजोरी देखिए सच्याइने विश्वास दिलाए।

प्रकाशित मिति:
प्रतिक्रिया दिनुहोस्