काठमाडौंमा गाईजात्रा उत्सव, हाँस्य कलाकारहरूको व्यङ्ग्यात्मक प्रस्तुति देशको समसामयिक घटनामा केन्द्रित

काठमाडौंमा आज गाईजात्रा पर्व धूमधामसँग मनाइयो। यस अवसरमा रिपोर्टर्स क्लब नेपालले चर्चित हाँस्य कलाकारहरूसँग विशेष साक्षात्कार कार्यक्रम आयोजना गर्‍यो। कार्यक्रममा सन्तोष खनाल, सुयशा खनाल, सुवोध गौतम, दमन रूपाखेती, दिनेश काफ्ले, प्रभात लामा, सुन्दर खनाल, हिमेश पन्तलगायतका कलाकारहरूले आ–आफ्ना प्रस्तुति राखे।

कलाकार दमन रूपाखेतीले पूर्वप्रधानमन्त्री केपी शर्मा ओली, शेरबहादुर देउवा र पुष्पकमल दाहाल ‘प्रचण्ड’ लगायत शीर्ष नेताहरूलाई लक्ष्य गर्दै व्यङ्ग्य प्रहार गरे। आफ्नो प्रस्तुतीमार्फत उनले वृद्ध नेताहरूले अब राजनीतिबाट सन्यास लिनुपर्ने सन्देश दिए। ओलीको बोली र व्यवहारप्रति तिखो टिप्पणी गर्दै उनले जनतालाई गुमराह पार्ने नेताहरूमाथि गाईजात्रे शैलीमा प्रहार गरे।

हाँस्य कलाकार शिवशंकर रिजाल ‘जोगिन्दर’ ले देशमा फैलिएको भ्रष्टाचारबारे कवितात्मक व्यङ्ग्य प्रस्तुत गरे। उनले २२ वर्षदेखि निरन्तर गाईजात्रामा प्रस्तुति दिँदै आएको बताउँदै यस वर्ष पनि ‘मिसन नौटङ्की’ मार्फत दर्शक सामु आएको जानकारी दिए।

श्रीकृष्ण सिम्खडाले माओवादी केन्द्रका अध्यक्ष प्रचण्ड, कांग्रेस सभापति देउवालगायतका नेताहरूको क्यारिकेचर प्रस्तुत गर्दै आफ्नै शब्दमा तयार पारेको गीत सुनाए।

कलाकार राजा राजेन्द्रले देशको सकारात्मक पक्ष पनि देख्नुपर्ने धारणा व्यक्त गर्दै विगत र वर्तमानको तुलनात्मक अवस्थाबारे सचेत रहन आग्रह गरे।

वरिष्ठ कलाकार शैलेन्द्र सिम्खडाले २०३७ सालदेखि निरन्तर गाईजात्रामा सहभागी हुँदै आएको जनाउँदै, हाँस्य–व्यङ्ग्यमार्फत समाजमा सकारात्मक सन्देश फैलाउनु नै आफ्नो उद्देश्य भएको बताए। उनले वर्तमान सामाजिक अवस्थालाई लक्षित गर्दै व्यङ्ग्यात्मक कविता पनि सुनाए, जसमा भ्रष्टाचार, सहकारी ठगी, प्रशासनिक कमजोरीजस्ता विषय उठाइएका थिए।

गाईजात्रा पर्वका यी प्रस्तुतीहरूले दर्शकलाई हँसाउँदै सोच्न बाध्य पारे।