भोल्टे रोमिङ सेवा सुरु गर्ने पहिलो नेपाली टेलिकम कम्पनी बन्यो एनसेल

काठमाडौं, साउन २२ – एनसेलले अन्तर्राष्ट्रिय भ्वाइस ओभर लङ टर्म इभोल्युसन (VoLTE) रोमिङ सेवा सुरु गर्दै भोल्टे रोमिङ सुविधा प्रदान गर्ने पहिलो नेपाली टेलिकम कम्पनीको पहिचान बनाएको छ। यो सेवा नेपाल बाहिर जाने एनसेल प्रयोगकर्तासँगै नेपाल आउने विदेशी पर्यटकका लागि लक्षित गरिएको हो।

यस प्रविधिमार्फत अब एनसेलका ग्राहकहरूले विदेशमा रहँदा पनि उच्च गुणस्तरको आवाजका साथ स्पष्ट भ्वाइस कल गर्न र फास्ट डेटा सेवा उपयोग गर्न सक्नेछन्।

एनसेलले अघिदेखि नै नेपाल भ्रमणमा आउने पर्यटकहरूका लागि इनबाउन्ड भोल्टे रोमिङ सेवा उपलब्ध गराउँदै आएको थियो। सेवा विस्तारको क्रममा अब कम्पनीले भारत जाने आफ्ना ग्राहकहरूलाई सोमबारदेखि लागू हुने गरी एयरटेलसँगको सहकार्यमा आउटबाउन्ड भोल्टे रोमिङ सेवा प्रदान गर्न थालेको हो।

भोल्टे प्रविधिले फोरजी नेटवर्कको माध्यमबाट एचडी स्तरको कल सुविधा दिन्छ, जसले ग्राहकलाई छिटो कनेक्ट हुने र स्पष्ट आवाजमा कुराकानी गर्न सक्ने सुविधा दिन्छ। यस सेवाको थपिएसँगै, एनसेलका प्रयोगकर्ताहरूको भारत यात्रा अझ सहज र उत्कृष्ट हुने भएको छ।

कम्पनीका अनुसार, अन्तर्राष्ट्रिय भ्रमणमा आउने ग्राहकहरूलाई गुणस्तरीय सेवा दिन एनसेल प्रतिबद्ध छ। एयरटेलसँगको सहकार्य कम्पनीका लागि महत्वपूर्ण उपलब्धि भएको बताउँदै, एनसेलले अन्य विश्वभरिका मोबाइल सेवा प्रदायकहरूसँग पनि भोल्टे रोमिङ सेवा विस्तारका लागि परीक्षण गरिरहेको जनाएको छ।

हाल एनसेल भारतको जियो र भोडाफोन, अमेरिकाको एटी एन्ड टी, टी मोबाइल, र भरिजोन, जापानको एनटीटी डोकोमो र सफ्टबैंक, चीनको चाइना मोबाइल र चाइना युनिकम, क्यानडाको बेल र टेलस लगायतका सेवा प्रदायकहरूसँग रोमिङ सेवा परीक्षण गर्दैछ।

इनबाउन्ड भोल्टे रोमिङका लागि भने एनसेलले एयरटेल र जियो (भारत), चाइना मोबाइल (चीन), ओरेडू (कुवेत), मोबिली (साउदी अरेबिया), एटी एन्ड टी (अमेरिका), र भियटेल (भियतनाम) का ग्राहकहरूलाई सेवा दिँदै आएको छ। एनसेलले आफ्नो रोमिङ नेटवर्क विस्तार गर्दै ग्राहकहरूलाई देशभित्र मात्र होइन, विदेशमा पनि निरन्तर जडानमा राख्न प्रतिबद्धता जनाएको छ।