बहुविवाहलाई मान्यता दिन खोजिएको कानुनी संशोधनप्रति कानुनविद्हरुको तीव्र विरोध

बहुविवाहलाई कानुनी मान्यता दिनेगरी प्रस्तावित कानुन संशोधनको चौतर्फी आलोचना भइरहेको छ। रिपोर्टर्स क्लब नेपालमा आयोजित साक्षात्कार कार्यक्रममा वरिष्ठ कानुनविद्हरू रामनारायण बिडारी, दिनेश त्रिपाठी र बालकृष्ण नेउपानेले यस प्रस्तावको कडा विरोध गरे।

वरिष्ठ अधिवक्ता बिडारीले यस्तो कानून अराजक, अश्लील र महिलामाथिको दमन हुने बताए। त्रिपाठीले बहुविवाहलाई सामाजिक भ्रष्टाचार भनी निन्दा गर्दै लोकतान्त्रिक समाजमा यस्तो सोच पनि अस्वीकार्य भएको बताए। नेउपानेले भने राजनीतिक स्वार्थका कारण यस्तो कानुन ल्याउन खोजिएको आरोप लगाए।

तीनै कानुनविद्हरूले बहुविवाहको मान्यता महिलामाथिको हिंसा र लोकतान्त्रिक मूल्यको अपमान भएको भन्दै यस प्रकारको कानुन संसदबाट पारित हुन नदिन आग्रह गरे।