काठमाडौंमा अन्तरधार्मिक राष्ट्रिय गोलमेच सम्मेलनको तयारी, धर्मनिरपेक्षता कार्यान्वयनमा जोड

धार्मिक स्वतन्त्रता सहितको धर्मनिरपेक्षताको प्रभावकारी कार्यान्वयनका लागि अन्तरधार्मिक राष्ट्रिय गोलमेच सम्मेलन–२०८२ काठमाडौंमा आयोजना हुने भएको छ। सोमबार राजधानीमा आयोजित पत्रकार सम्मेलनमार्फत आगामी भदौ २३, २४, र २५ गते सम्मेलन सञ्चालन हुने जानकारी दिइएको हो।

गोलमेच सम्मेलनको मुख्य उद्देश्य देशभरिका विविध धर्म तथा सम्प्रदायहरूबीच आपसी संवाद, विश्वास, र सहकार्यको वातावरण निर्माण गर्नुका साथै संविधान संशोधनजस्ता गम्भीर विषयमा साझा धारणा र सुझावहरू प्रस्तुत गर्नु रहेको बताइएको छ।

सम्मेलनमा हिन्दु, बौद्ध, इस्लाम, किरात, ख्रीष्टियन, बहाई, जैन, बोन, सिख, प्रणामी, मस्टो, कबिरलगायतका अल्पसंख्यक धार्मिक समुदायहरूका प्रतिनिधिहरू, मानव अधिकारकर्मी, कानूनविद्, शान्ति निर्माणसँग सम्बन्धित संस्था, युवा तथा महिला अगुवाहरू, र राष्ट्रिय मानव अधिकार आयोगका प्रतिनिधिहरूको सहभागिता रहनेछ।

कार्यक्रमपछि सबै सहभागीको सहमतिमा तयार पारिने ‘काठमाडौं अन्तरधार्मिक घोषणापत्र–२०८२’ मार्फत सम्मेलनका निष्कर्ष र सिफारिसहरू सरकार, संसद, मानव अधिकार आयोग तथा सम्बन्धित निकायहरूलाई बुझाइने जानकारी दिइएको छ।

सम्मेलनका संरक्षक विश्वेन्द्र पासवानले नेपालको संविधानमा धर्मनिरपेक्षताको गलत व्याख्या भएको आरोप लगाउँदै देशलाई एउटै जाति, भाषा र नश्लको बनाउने प्रयास भइरहेको टिप्पणी गरे। उनले नेपालमा ३७ प्रतिशतभन्दा बढी जनसंख्या अन्तरधार्मिक समुदायमा पर्ने भन्दै देश बहुधार्मिक राष्ट्रको रूपमा स्थापित भइसकेको बताए।

‘धर्मनिरपेक्षता सबै नागरिकको नैसर्गिक अधिकारका रूपमा सम्मानपूर्वक लागू हुनुपर्छ,’ उनले जोड दिए।