थारू आयोगमा विवाद चुलियो, हाजिरी विवादपछि सदस्यले कार्यवाहक अध्यक्षलाई कार्यकक्षमै थुने

थारू आयोगको आन्तरिक विवाद सतहमा आएको छ। कार्यवाहक अध्यक्ष सुबोध सिंह थारू र सदस्य शान्ति मोदीबीच हाजिरी विवाद चर्किएपछि स्थिति नियन्त्रणभन्दा बाहिर पुगेको छ।

आयोगको कार्यालयमा बुधबार अपराह्न सदस्य मोदीले कार्यवाहक अध्यक्ष थारूलाई कार्यकक्षभित्रै थुनेर ढोकामा ताला लगाइदिएकी हुन्। घटनाको जानकारी पाएपछि प्रहरी पुगेर ढोका खोल्दै अध्यक्ष थारूलाई बाहिर निकालेको थियो।

थारूले घटनाबारे जानकारी दिँदै भने, “सदस्य शान्ति मोदी एक हप्ताको बिदा लिएर एक महिनासम्म कार्यालय नआइ हराएकी थिइन्। अहिले सबै दिनको हाजिरी गर्न पाउनुपर्छ भन्दै कार्यालयमा ताला लगाउन खोजेपछि विवाद भयो।”

उता, सदस्य मोदीले भने आफू बुधबारदेखि नै कार्यालय उपस्थित हुँदै आएको तर हाजिरी गर्न नदिएको आरोप लगाएकी छन्। विवाद उत्कर्षमा पुग्दा आज दिउँसो करिब १ बजे उनले कार्यवाहक अध्यक्ष थारूको कार्यकक्षमा ताला लगाउँदै गरेको तस्बिर सामाजिक सञ्जालमा सार्वजनिक गरिन्।

मोदीले फेसबुकमा तस्बिरसहित लेखेकी छन्, “थारू आयोगको का.वा. अध्यक्ष शुबोध सिंह थारूको कार्यकक्षमा मा. शान्ति मोदीद्वारा तालाबन्दी।”

उनको यो पोष्टपछि थारू आयोगभित्र चलिरहेको आन्तरिक असमझदारी र विवाद झन् सार्वजनिक रूपमा उजागर भएको छ। आयोगभित्र विगतदेखि नै मतभेद र असमझदारीका खबरहरू बाहिर आइरहेका थिए, तर आइतबार सदस्य मोदीले आफैं तस्बिर सार्वजनिक गरेपछि विवाद नयाँ चरणमा पुगेको देखिएको छ।