एनएफपिजेले सिन्धुपाल्चोकमा शाखा विस्तार गर्दै नयाँ समिति गठन

काठमाडौं, साउन १८ – राष्ट्रिय फोटो पत्रकार समूह नेपाल (एनएफपिजे) ले जिल्ला तहमा आफ्नो सञ्जाल विस्तार गर्ने अभियानलाई तीव्रता दिँदै शुक्रबार सिन्धुपाल्चोक शाखा गठन गरेको छ।

बागमती प्रदेश अन्तर्गतको सिन्धुपाल्चोक जिल्लाको चौतारामा सम्पन्न प्रथम जिल्ला भेलाले विजय नेपालको अध्यक्षतामा नयाँ कार्यसमिति चयन गरेको हो। उपाध्यक्षमा मानकाजी तामाङ, सचिवमा सागर खड्का, कोषाध्यक्षमा प्रेम लामा र सदस्यमा सुजन श्रेष्ठ चयन भएका छन्। बाँकी दुई रिक्त सदस्य पदहरू समितिले चाँडै चयन गर्ने जनाएको छ।

भेला कार्यक्रम संयोजक सुन्दर शिरिषको अध्यक्षतामा सम्पन्न भएको थियो। कार्यक्रममा एनएफपिजे नेपालका केन्द्रीय वरिष्ठ उपाध्यक्ष सागर श्रेष्ठ प्रमुख अतिथिका रूपमा, नेपाल पत्रकार महासंघ सिन्धुपाल्चोकका अध्यक्ष ध्रुव दंगाल विशेष अतिथिका रूपमा सहभागी थिए। साथै, एनएफपिजेका केन्द्रीय सचिव प्रविन राई, केन्द्रीय सदस्य सुशील कुमार श्रेष्ठ, बागमती प्रदेश अध्यक्ष राजेन्द्र गजुरेल, प्रदेश सचिव कुमार श्रेष्ठ, नेपाल आदिवासी जनजाति महासंघ बागमती प्रदेश अध्यक्ष युवराज श्रेष्ठ, पत्रकार संघका प्रतिनिधि, समाजसेवी तथा पत्रकारहरूको उल्लेखनीय उपस्थिति रहेको थियो।

प्रमुख अतिथि श्रेष्ठले फोटो पत्रकारिता व्यवसायिक चुनौतीमा परिरहेको वर्तमान सन्दर्भमा एनएफपिजे र यसको सिन्धुपाल्चोक शाखा अलग पहिचानसहित अघि बढ्ने विश्वास व्यक्त गरे। उनले जिल्लाको पर्यटन प्रवर्द्धनमा फोटो पत्रकारको भूमिका महत्वपूर्ण हुने उल्लेख गर्दै संगठनले भविष्यमा अझ प्रभावकारी रूपमा काम गर्ने बताए।

विशेष अतिथि ध्रुव दंगालले एनएफपिजे शाखाको गठनलाई सकारात्मक कदमको रूपमा लिँदै पत्रकार महासंघले सहकार्यका लागि सधैं तयार रहेको बताए।

कार्यक्रममा केन्द्रीय सचिव प्रविन राईले संस्थाले सञ्चालन गरिरहेका गतिविधि र भावी योजनाका विषयमा जानकारी दिएका थिए। त्यस्तै, बागमती अध्यक्ष राजेन्द्र गजुरेलले पर्यटन प्रवर्द्धनमा फोटो पत्रकारिताको योगदान उल्लेख गर्दै नयाँ शाखाले सक्रियताका साथ जिल्लामा क्रियाशील रहने बताए।

नवगठित समितिले फोटो पत्रकारितालाई मर्यादित र अनुशासित बनाउँदै पत्रकारहरूको हकहितको संरक्षणमा केन्द्रित भएर काम गर्ने प्रतिबद्धता जनाएको छ।