सरकार ध्रुबे हात्ती जस्तै, मिले पनि लडे पनि जनताकै नोक्सानः प्रकाश ज्वाला

काठमाडौं, साउन १ ।
नेकपा (एकीकृत समाजवादी) का उपाध्यक्ष प्रकाश ज्वालाले वर्तमान सरकारलाई ‘ध्रुबे हात्ती’को संज्ञा दिँदै, चाहे सत्तारूढ दल मिलून् वा लडून्, परिणाममा जनताको क्षति हुने बताएका छन्।

काठमाडौंमा आयोजित साक्षात्कार कार्यक्रममा उनले देशमा देखिएको प्रमुख समस्या नै सरकार भएको बताए। “सरकार जनताको अभिभावक हो तर अहिले सरकारविहीनताको अनुभूति भएको छ,” उनले भने।

उनले प्रधानमन्त्री केपी शर्मा ओली नेतृत्वको सरकारलाई गैरजिम्मेवार, भ्रष्टाचारमा संलग्न र दलाल–माफियामुखी भन्दै आलोचना गरे। मन्त्रिपरिषद्का अधिकांश सदस्य घुसखोरी र अनियमिततामा मुछिएको आरोप उनले लगाए।

सार्वजनिक सम्पत्ति विवरण नखुलाएको, सुशासनको सट्टा ‘कुशासन समिति’ बनेको, संसदलाई रबरस्ट्याम्प बनाउन खोजिएको र जनसरकारका विधेयकलाई सरकारले बेवास्ता गरेको उनको टिप्पणी थियो।

भूमि विधेयकलाई भूमाफियाको पक्षमा ल्याइएको र जघन्य अपराधमा आममाफी दिने गरी फौजदारी कानुन संशोधन गरिएको आरोप पनि उनले लगाए। भूमिहीन, सुकुम्बासीप्रति सरकार गम्भीर नरहेको उनको भनाइ थियो।

अन्त्यमा, पार्टी अध्यक्ष माधवकुमार नेपालमाथि लगाइएको भ्रष्टाचार मुद्दा पूर्वाग्रही र प्रतिशोधपूर्ण भएको दाबी गर्दै उनले त्यसको राजनीतिक र कानुनी प्रतिवाद गर्ने घोषणा गरे।