लोकतन्त्र युवाको सक्रिय सहभागिता विना अपूरो रहन्छः डा. डिला संग्रौला

काठमाडौं, १ साउन।
नेपाली कांग्रेसको पेशागत तथा बुद्धिजीवी विभागकी प्रमुख तथा पूर्व सांसद डा. डिला संग्रौला पन्तले लोकतन्त्र सुदृढ र प्रभावकारी बनाउन युवाको सक्रिय सहभागिता अपरिहार्य रहेको धारणा व्यक्त गरेकी छन्।

काठमाडौँस्थित प्रज्ञा कुञ्ज स्कुलले आयोजना गरेको नमुना संघीय सभालाई प्रमुख अतिथिको रूपमा सम्बोधन गर्दै डा. संग्रौलाले परिवर्तनका वाहकका रूपमा युवाले निराश नबनी आशावादी सोच राख्नुपर्नेमा जोड दिइन्। उनले भनिन्, “गुनासो मात्र होइन, समाधान खोज्ने बानी बसालौं। समाजप्रति उत्तरदायी, सचेत र संलग्न नागरिक बन्ने प्रयास गरौं। लोकतन्त्रलाई गाली होइन, जिम्मेवारी चाहिन्छ। तपाईंहरूको सोच, आवाज र निर्णयले देश बदल्न सक्छ।”

युवासँग काँग्रेस सधैं सहकार्य गर्न तत्पर रहेको उल्लेख गर्दै उनले मोडल संसद् जस्ता अभ्यासहरूबाट नयाँ ऊर्जा, प्रतिबद्धता र रचनात्मक विचारहरू उदाउने विश्वास व्यक्त गरिन्। संविधान संशोधनको आवश्यकता देखिएको उल्लेख गर्दै उनले त्यसको नेतृत्व नेपाली कांग्रेसले लिन लागेको पनि बताइन्।

“लोकतन्त्रको रक्षा, संघीय प्रणालीको सकारात्मक कार्यान्वयन र न्यायपूर्ण समाज निर्माणका लागि हामी सबै एकसाथ अघि बढ्नुपर्छ,” संग्रौलाको भनाइ थियो।

उनी भन्छिन्, आजका विद्यार्थी नै भोलिका सांसद, मन्त्री, वैज्ञानिक, चिकित्सक र उद्यमी हुन्। त्यसैले गुणस्तरीय, सुलभ र व्यावसायिक शिक्षा सबैको प्राथमिकता बन्नुपर्ने आवश्यकता औंल्याइन्। साथै, सार्वजनिक शिक्षालाई सुदृढ, निजी शिक्षालाई नियमन र प्राविधिक शिक्षाको प्रवर्द्धन गर्ने नीति कांग्रेसले लिएको जानकारी पनि दिइन्।

स्वरोजगार र स्टार्टअप प्रवर्द्धनका लागि राज्यको विशेष सहयोग आवश्यक रहेको बताउँदै उनले संसद्को मर्यादा कायम राख्ने जिम्मेवारी राजनीतिक दलहरूमाथि रहेको धारणा राखिन्।

कार्यक्रम आयोजक प्रज्ञा कुञ्ज स्कुलकी प्रिन्सिपल तथा निर्देशक सुनिता पौडेलले नमुना संघीय सभाको उद्देश्य विद्यार्थीहरूलाई नेपालको संघीय शासन प्रणाली र कानून निर्माण प्रक्रियाबारे सैद्धान्तिक तथा प्रयोगात्मक ज्ञान दिनु रहेको बताइन्। साथसाथै, उनीहरूमा आत्मविश्वास, वक्तृत्वकला र सामाजिक अन्तरक्रिया सीप विकास गर्ने उद्देश्य पनि कार्यक्रमले राखेको जानकारी दिँदै उनले सबै सहभागी तथा सहयोगीलाई धन्यवाद व्यक्त गरिन्।