गायक रत्नदिप चौधरीलाई चौथो सिल्भर म्युजिक अवार्डमा सर्वोत्कृष्ट भाषाभाषी अवार्ड

गायक रत्नदिप चौधरीले चौथो संस्करणको सिल्भर म्युजिक अवार्डमा सर्वोत्कृष्ट भाषाभाषी अवार्ड प्राप्त गरेका छन्।

प्रियसी म्युजिकको आयोजनामा सम्पन्न प्रतियोगितामा चौधरीले थारु भाषामा गाएको "नथिया वाली" बोलको गीतले उनलाई यो सम्मान दिलाएको हो। गीतमा शब्द, संगीत र स्वर सबै चौधरी स्वयंले तयार पारेका हुन्, जसले थारु भाषामा उत्कृष्टताको मान्यता पाएको हो।

सुनसरी निवासी तथा सशस्त्र प्रहरी बलको प्राविधिक विभागमा कार्यरत गायक चौधरीले २०५५ सालदेखि थारु संगीतमा सक्रियता जनाउँदै आएका छन्। उनले पहिलो पटक गाएको थारु गीतबाटै चर्चा बटुलेका थिए। २०५६ मा गाइएको "ए हौ साली झुम्कावाली" शीर्षकको गीत निकै लोकप्रिय भएको थियो। अहिलेसम्म उनले दर्जनभन्दा बढी चर्चित गीतहरूमा स्वर दिइसकेका छन्।