एसईईमा उत्कृष्ट थारु विद्यार्थीहरूलाई थारु विद्यार्थी सभाद्वारा सम्मान

काठमाडौं, साउन ३ – थारु विद्यार्थी सभा केन्द्रीय समितिले शनिबार काठमाडौंको बुधनगरस्थित स्वप्नबाटिका कलेजको प्रांगणमा एक भव्य कार्यक्रमको आयोजना गर्दै यस वर्षको एसईई परीक्षा पास गरेका थारु समुदायका २०० भन्दा बढी विद्यार्थीहरूलाई सम्मान गरेको छ।

यसअघि सभाले विशेष कार्यक्रममार्फत थारु समुदायका विद्यार्थीहरूको मेहनत र सफलतालाई कदर गर्दै उनीहरूलाई सम्मान गर्ने घोषणा गरेको थियो। सभाले उक्त घोषणालाई कार्यान्वयनमा ल्याउँदै भव्य समारोहमार्फत देशभरका थारु विद्यार्थीहरूलाई एकै ठाउँमा सम्मानित गर्‍यो।

कार्यक्रमका प्रमुख अतिथि प्रतिनिधिसभा सदस्य तथा पूर्वमन्त्री भगवती चौधरीले सम्मानित विद्यार्थीहरूलाई प्रमाणपत्र प्रदान गरिन्। यस्तै, अन्य विशिष्ट अतिथिहरूले दोसल्ला र अबिर लगाएर विद्यार्थीहरूलाई सम्मान गरेका थिए। कार्यक्रममा प्रमुख अतिथि चौधरीसहित थारु समुदायका एक दर्जनभन्दा बढी संघ–संस्थाका प्रतिनिधिहरूको उल्लेखनीय उपस्थिति थियो।

सभाका अध्यक्ष शुशिला चौधरीका अनुसार, जुनसुकै ग्रेडमा एसईई पास गरेका विद्यार्थीहरूको हौसला बढाउन र उनीहरूलाई थप मेहनतप्रति प्रेरित गर्न कार्यक्रम आयोजना गरिएको हो। उनले भविष्यमा पनि यस प्रकारका प्रेरणादायी कार्यक्रमलाई निरन्तरता दिइने बताइन्।

कार्यक्रममा अतिथिहरूले सम्मानित विद्यार्थीहरूको सफलताको प्रशंसा गर्दै उज्ज्वल भविष्यको शुभकामना व्यक्त गरेका थिए। साथै, सांस्कृतिक माहोलमा झनै रङ थप्ने काम चर्चित गायिका समीक्षा चौधरी र गायक आरके थारुले सांगीतिक प्रस्तुति दिँदै गरे।

थारु विद्यार्थी सभाले हरेक वर्ष एसईई उतीर्ण थारु विद्यार्थीहरूलाई सम्मान गर्दै आएको छ। समुदायको शैक्षिक उन्नतिमा यो कार्यक्रमले महत्वपूर्ण योगदान पुर्‍याउँदै आएको सभाको भनाइ छ।