गायक दीपक बज्राचार्यको नयाँ प्रस्तुति ‘प्रोजेक्ट नजिक’ पोडकास्टमार्फत

दुई दशकभन्दा बढी समयदेखि नेपाली संगीत क्षेत्रमा सक्रिय गायक दीपक बज्राचार्य अब पोडकास्टको नयाँ यात्रा सुरु गर्न लागेका छन्। उनले संचालन गर्न लागेको पोडकास्ट श्रृंखला ‘प्रोजेक्ट नजिक’ मंगलबार बेलुकी ८ बजेबाट एपीवान टेलिभिजनमार्फत प्रशारण हुने भएको छ।

यसअघि टेलिभिजन कार्यक्रम ‘TMS’ मा पनि प्रस्तोता भइसकेका बज्राचार्यले अब पोडकास्टमार्फत समाजमा योगदान पुर्‍याउँदै आएका विभिन्न क्षेत्रका व्यक्तिहरूका अनकथित पक्षहरू उजागर गर्ने प्रयास गर्नेछन्। साथै, आफ्ना समकालीन साथीहरू तथा शुभचिन्तकहरूसँग गहिरो संवाद स्थापना गर्नु श्रृंखलाको अर्को उद्देश्य हो।

बज्राचार्यका अनुसार, ओझेलमा परेका प्रतिभा र स्रष्टाको योगदानलाई सम्मान गर्दै, हराउँदै गइरहेका र कमै मात्रामा चिनिएका नेपाली बाजाहरूको विशेषता दर्शकसामु पुर्‍याउन यो श्रृंखला सुरु गरिएको हो।

पोडकास्टको सार्वजनिक प्रोमोमा बरिष्ठ लोकगायक कुमार बस्नेत, चर्चित सञ्चारकर्मी प्रकाश सुवेदी, नेपालका पहिलो ड्रमर देव राना तथा १९७४ एडी ब्याण्डका गिटारिस्ट मनोज केसी लगायतका झलकहरू समावेश गरिएको छ।

एपीवान टेलिभिजनमा प्रशारणपछि, ‘प्रोजेक्ट नजिक’का सबै एपिसोडहरू दीपक बज्राचार्यको युट्युब च्यानल ‘D Production’ मार्फत पनि हेर्न सकिनेछ।