नेविसंघको माग: योग्यताका आधारमा पूर्ण खुला प्रतिस्पर्धाबाट शिक्षक नियुक्ति गरियोस्

नेपाली कांग्रेसको विद्यार्थी संगठन नेपाल विद्यार्थी संघ (नेविसंघ) ले शिक्षक नियुक्ति प्रक्रिया पूर्ण रूपमा योग्यतामा आधारित खुला प्रतिस्पर्धाबाट गर्नुपर्ने माग अघि सारेको छ।

हाल विद्यालय शिक्षा विधेयकमा शिक्षक पदपूर्ति आन्तरिक प्रक्रियाबाट ६० प्रतिशत र खुला प्रतिस्पर्धाबाट ४० प्रतिशत गरिने प्रस्ताव छ। तर नेपाल शिक्षक महासंघले आन्तरिक ७५ प्रतिशत र खुला २५ प्रतिशत राख्नुपर्ने अडान लिँदै आएको छ।

यसबीच नेविसंघका अध्यक्ष दुजाङ शेर्पाले बिहीबार जारी विज्ञप्तिमा शिक्षक छनोट पूर्ण रूपमा योग्यताको आधारमा खुला प्रतिस्पर्धाबाट मात्रै हुनुपर्ने स्पष्ट माग राखेका छन्।

नेविसंघले इसिडी सहजकर्ताहरूलाई शिक्षकको मान्यता दिइनुपर्ने, साथै शिक्षकहरूको सम्मान, दक्षता र सेवासुविधा अभिवृद्धि गरिनुपर्ने मागसमेत अघि सारेको छ। साथै, अस्थायी तथा राहत शिक्षकहरूका लागि ‘गोल्डेन ह्याण्डसेक’जस्ता राहत प्याकेज उपलब्ध गराउनुपर्ने पनि संगठनको भनाइ छ।

विद्यालय शिक्षा ऐन तत्काल पारित गर्न सरकारसँग आग्रह गर्दै नेविसंघले शिक्षक नियुक्तिसम्बन्धी विषयमा सरकार र शिक्षक महासंघबीच सहमति नजुट्दा संसदको शिक्षा, स्वास्थ्य तथा प्रविधि समितिमा विधेयक अड्किएकोतर्फ पनि ध्यानाकर्षण गराएको छ।