"मेरो कुनै पनि गल्तीको प्रमाण छैन": माधव नेपाल

जनकपुरधाम, धनुषा — नेकपा (एकीकृत समाजवादी) का अध्यक्ष तथा पूर्वप्रधानमन्त्री माधवकुमार नेपालले आफूले कुनै पनि अवैध वा गलत कार्य नगरेको दाबी गरेका छन्।

जनकपुरधाममा मंगलबार आयोजित पार्टीको धनुषा जिल्ला अधिवेशन उद्घाटन समारोहमा बोल्दै उनले पतञ्जली जग्गा प्रकरणमा आफू प्रत्यक्ष वा अप्रत्यक्ष रूपमा संलग्न नरहेको स्पष्ट पारे। नेपालले आरोपबिना लाञ्छना लगाइएको भन्दै आफू सत्यको पक्षमा अडिग रहेको बताए।

"मैले गल्ती गरेको छु भन्ने कुनै आधार र प्रमाण छैन," नेपालले भने, "देश र जनताको सेवामा समर्पित छु, र संविधान र कानुनको पालना गर्दै आएको छु। मलाई अदालतप्रति विश्वास छ।"

उनले अदालत न्यायको पक्षमा उभिने विश्वास व्यक्त गर्दै सबै वकिलहरूलाई धन्यवादसमेत दिए। "मलाई साथ र सहयोग गर्ने अधिवक्ताहरूप्रति आभार प्रकट गर्छु," अध्यक्ष नेपालले भने।

पतञ्जलीसँग सम्बन्धित जग्गा कारोबारमा कानुनी प्रक्रिया अनुसार सबै काम सम्पन्न भएको दाबी गर्दै उनले कुनै अवैधानिकता नभएको उल्लेख गरे। "न कानून विपरीत कुनै कार्य भएको छ, न संविधानविपरीत," नेपालले स्पष्ट गरे।

नेपालले पतञ्जली संस्था देशभर दर्जनौं अस्पताल सञ्चालन गर्दै आएको उल्लेख गर्दै, संस्थाको नाममा अनावश्यक विवाद सिर्जना नगर्न आग्रह गरे।

उनले हालको राजनीति प्रतिक्रियावादी र पुँजीवादी सोचको प्रभावमा आएको भन्दै सिङ्गो कम्युनिस्ट आन्दोलन बदनाम हुन पुगेको चिन्ता व्यक्त गरे। त्यस्तो अवस्थाबाट बाहिर निस्कन अब जनताको पक्षमा इमान्दार भएर काम गर्नुपर्नेमा उनले जोड दिए।