सांसदले गल्ती गर्दा कर्मचारीलाई दोष दिने प्रवृत्ति गलत हो : सुमना श्रेष्ठ

काठमाडौं। राष्ट्रिय स्वतन्त्र पार्टीकी सांसद सुमना श्रेष्ठले संसदीय प्रक्रियामा देखिएको गम्भीर कमजोरीप्रति आपत्ति जनाउँदै, सांसदहरूले आफ्नै गल्तीका लागि कर्मचारीहरूलाई दोषारोपण गर्ने प्रवृत्ति अनुचित भएको बताएकी छन्।

मंगलबार संसदको बैठकमा छलफलको क्रममा बोल्दै सांसद श्रेष्ठले समितिबाट आएका प्रतिवेदनहरू नपढीकनै बैठकमा बोल्ने केही सांसदहरूको प्रवृत्तिले गल्ती गराउने गरेको र त्यसपछि त्यो गल्तीको दोष कर्मचारीलाई थोपर्ने चलन देखिएको स्पष्ट पारिन्।

श्रेष्ठले भनिन्, “प्रतिवेदन पढ्नै नपढी बैठकमा बोल्दा गल्ती भएको छ। केही सांसदहरूले त मन्त्रालयको नाम नै हटाएर बोल्ने गरेका छन्। त्यो बेलासम्म त त्यो गल्ती भइरहन्छ। जब ध्यानाकर्षण हुन्छ, तबमात्र सच्याइन्छ। तर सांसदहरूले गल्ती गरेपछि त्यसको दोष कर्मचारीतन्त्रलाई देखाएर पन्छिन खोज्नु गलत हो।”

उहाँले सांसदहरू जिम्मेवार ढंगले प्रस्तुत हुनुपर्नेमा जोड दिँदै भनिन्, “संसदमा प्रस्तुत विषयवस्तु नबुझी वा नपढी केवल दलको निर्णयअनुसार बोल्नु संसदीय मर्यादामाथि नै प्रश्न हो।”

श्रेष्ठले गल्ती स्वीकृत गर्न सक्ने संस्कारको खाँचो औंल्याउँदै थपिन्, “गल्ती हुनु स्वाभाविक हो, तर त्यो सच्याउनका लागि पहिला गल्ती कहाँबाट भयो भन्ने बुझ्नुपर्छ। जबसम्म गल्तीको स्वीकारोक्ति हुँदैन, सुधार पनि सम्भव हुँदैन।”