नागार्जुन रिसोर्टको उद्घाटन सम्पन्न, पर्यटन प्रवर्द्धनमा योगदानको अपेक्षा

काठमाडौं — तारकेश्वर नगरपालिका–३ स्थित नागार्जुन रिसोर्टको औपचारिक उद्घाटन मंगलबार एक विशेष समारोहबीच सम्पन्न भयो। काठमाडौंको शान्त र हरियाली वातावरणमा रहेको यो रिसोर्टले आन्तरिक तथा अन्तर्राष्ट्रिय पर्यटन प्रवर्द्धनमा महत्वपूर्ण भूमिका खेल्ने अपेक्षा गरिएको छ।

वन तथा वातावरण मन्त्री ऐनबहादुर शाही ठकुरीले उद्घाटन कार्यक्रममा सहभागी हुँदै, निजी क्षेत्रको यस्तो लगानीले पर्यटन विकासमा टेवा पुर्‍याउने उल्लेख गरे। उनले वन, निकुञ्ज र संरक्षित क्षेत्रको सदुपयोग गर्दै पर्यटनसँग जोडिनुपर्ने धारणा राखे। नेपाललाई विश्व पर्यटनको प्रमुख गन्तव्य बनाउनेतर्फ सरकार प्रतिबद्ध रहेको पनि मन्त्री शाहीले बताए।

कार्यक्रममा आध्यात्मिक गुरू स्वामी आनन्द अरुणले नेपाललाई "स्वर्ण भूमि" भन्दै, यसको प्रकृति, संस्कृति र शान्तिका विशेषताले विश्वभरका पर्यटकलाई आकर्षित गर्न सक्ने बताए। उनले देशको स्रोतसाधनको सदुपयोगमा चेतना आवश्यक रहेको औँल्याए। तारकेश्वर नगरपालिकाका प्रमुख कृष्णहरी महर्जन, उपप्रमुख सृजना बुर्लाकोटी अर्याल र वडा नं. ३ का अध्यक्ष परशुराम अर्यालले यस रिसोर्टले स्थानीय पर्यटन पूर्वाधारमा ठुलो योगदान गर्ने धारणा राखे।

कार्यक्रममा वरिष्ठ सेफ गोविन्दनरसिंह केसीले रिसोर्टले अन्तर्राष्ट्रिय स्तरका पाहुनालाई गुणस्तरीय सेवा दिन सक्ने बताए। संञ्चालक निरोज पन्त र व्यवस्थापन समितिका सदस्यहरू समेतले रिसोर्टले स्थानीय रोजगारी सिर्जना गर्दै समुदायमा सकारात्मक प्रभाव पार्ने लक्ष्य लिएको स्पष्ट पारे।

हाल रिसोर्टमा ६५ वटा सुविधा सम्पन्न कोठा छन्। व्यवस्थापक अभिषेक विक्रम शाहका अनुसार, एयर कन्डिसनयुक्त डिलक्स कोठाबाट काठमाडौं उपत्यका अवलोकन गर्न सकिन्छ। साथै पर्याप्त पार्किङ, प्ले स्टेशन, कालुपाँडे डाँडासम्मको हाइकिङ र विविध परिकारहरू यहाँका आकर्षण हुन्।

प्राकृतिक शान्तता र आधुनिक सुविधाको समायोजनमा बनेको नागार्जुन रिसोर्टले नेपालको पर्यटन क्षेत्रमा नयाँ उचाइ थप्ने विश्वास आयोजकले व्यक्त गरेका छन्।