प्रधानमन्त्री कार्कीको अभिव्यक्तिले मुस्लिम समुदाय रुष्ट, माफी माग्न सुझाव

प्रधानमन्त्री सुशीला कार्कीले मुस्लिम समुदायबारे सार्वजनिक कार्यक्रममा व्यक्त गरेको भनाइप्रति मुस्लिम अगुवाहरूले कडा आपत्ति जनाएका छन्। आज काठमाडौंमा आयोजित पत्रकार सम्मेलनमार्फत उनीहरूले प्रधानमन्त्री कार्कीले आफ्नो अभिव्यक्ति फिर्ता लिएर माफी माग्नुपर्ने चेतावनी दिए।

प्रधानमन्त्री कार्कीले मुस्लिम समुदायको व्यवहार, प्रवृत्ति र केही मुस्लिम देशहरूमा महिलासम्बन्धी नीतिबारे बोलेको टिप्पणी विवादित बनेपछि मुस्लिम समूदाय आक्रोशित भएको हो।

मुस्लिम अगुवा मुन्ताज खानले प्रधानमन्त्रीको अभिव्यक्तिले मुस्लिम समुदायलाई बदनाम गर्ने प्रयास भएको बताइन्। उनले गलत अफवाह फैलाउनेहरूको विरुद्ध सरकारले कठोर कारबाही गर्नुपर्ने माग पनि गरिन्। ‘कुनै धर्मले सात वर्षका बालबालिकाको विवाहलाई समर्थन गर्दैन’, उनले भनिन्।

त्यस्तै, मुस्लिम अगुवा सलाउदिन दर्जीले पनि प्रधानमन्त्रीको अभिव्यक्ति आपत्तिजनक र निन्दनीय भएको बताए। उनले तत्काल अभिव्यक्ति फिर्ता लिएर मुस्लिम समुदायसँग माफी माग्न प्रधानमन्त्रीलाई आग्रह गरे।

मुस्लिम अगुवा ताज मोहम्मद मियाले प्रधानमन्त्री कार्कीको अभिव्यक्तिले साम्प्रदायिक विभाजनलाई बढावा दिने चेतावनी दिए। उनले मुस्लिम समुदायको इतिहास अध्ययन गर्नुपर्ने सुझाव पनि प्रधानमन्त्रीलाई दिए। उत्पीडनमा परे मुस्लिम समुदाय एकताबद्ध भएर उठ्ने परिस्थितिमा सरकारलाई समस्या हुनसक्ने उनको दाबी थियो।

वरिष्ठ अधिवक्ता डा. सुरेन्द्र भण्डारीले पनि प्रधानमन्त्रीको अभिव्यक्तिले सबै नेपालीको शिर झुकिएको भन्दै आलोचना गरे। उनले कुनै समुदायलाई अपहेलनायुक्त रूपमा प्रस्तुत गर्नु प्रधानमन्त्रीको पदको मर्यादासँग मेल नखाने बताए।

त्यसैगरी, पूर्वमन्त्री अब्दुल खानले प्रधानमन्त्री कार्कीको भनाइले मुस्लिम समुदायको भावना गम्भीर रूपमा आहत भएको उल्लेख गर्दै औपचारिक माफी माग्नुपर्ने धारणा राखे।