जनयुद्ध असफल भएको होइन, असफल पारिएको होः पूर्व जनमुक्ति सेना

पूर्व जनमुक्ति सेनाले जनयुद्ध आफैँ असफल नभई “असफल पारिएको” दाबी गरेको छ। जनमुक्ति सेना स्थापनाको अवसरमा काठमाडौंमा आयोजित पत्रकार सम्मेलनमा पूर्व लडाकुहरूले यस्तो टिप्पणी गरेका हुन्। तत्कालीन विद्रोही माओवादीले २०५८ साल मंसिर ८ गते औपचारिक रूपमा जनमुक्ति सेना गठनको घोषणा गरेको थियो।

विज्ञप्तिमा भनिएको छ, “हामीले लडेको जनयुद्ध असफल भएको होइन, असफल बनाइयो। त्यसैले नेताहरूको होइन, आफ्नै बलिदानको सम्मान गर्नुपर्छ। कुर्सीभन्दा जनताको पेट र भविष्यलाई प्राथमिकता दिइने, दलित, आदिवासी जनजाति, किसान, मजदुर र युवाको आवाजलाई केन्द्रमा ल्याउनुपर्छ।”

पूर्व लडाकुहरूले रगत, पसिना र बलिदानले नयाँ नेपालको कल्पना गरे पनि त्यो सपना पूरा हुन नसकेको उल्लेख छ। २०६३ सालपछि क्रान्तिको नेतृत्व ‘ढाडमा टेकेर टाउकोमा हान्ने’ नारासहित सहर पसेको र पूर्व लडाकुहरूको श्रम र बलिदानलाई सत्ताको भर्याङ बनाएको प्रति उनीहरूको असन्तुष्टि रहेको छ। नेताहरू सिंहदरबार पुगेपछि आफूहरूलाई बेवास्ता गरिएको र ज्यान जोखिममा राखेर लड्ने लडाकुहरू अहिले पनि गरिबी, बेरोजगारी र दुःखका अवस्थाबाट गुज्रिनुपरेको उनीहरूको आरोप छ।

पूर्व जनमुक्ति सेनाका अनुसार क्रान्तिका प्रमुख पात्र प्रचण्ड (पुष्पकमल दाहाल) पटक–पटक प्रधानमन्त्रीसम्म भए पनि अहिले दलदलमै फसिरहेको मूल्यांकन गरिएको छ। त्यस्तै, जनयुद्धका अर्को नेता बाबुराम भट्टराई क्रान्तिको मार्ग त्यागेर उदारवादका प्रवक्ता बन्न पुगेका र क्रान्तिका पीडा नबुझ्ने अवस्थामा पुगेको टिप्पणी उनीहरूले गरेका छन्।