चीन–अमेरिका बीच टिकटक विवाद समाधान गर्ने प्रारम्भिक सहमति

काठमाडौं । चीन र अमेरिकाबीच लामो समयदेखि चलिरहेको टिकटक विवाद समाधान गर्न सहकार्यको बाटो अवलम्बन गर्ने प्रारम्भिक सहमति भएको छ।

चीनको वाणिज्य मन्त्रालयअन्तर्गतका अन्तर्राष्ट्रिय व्यापार प्रतिनिधि तथा उपमन्त्री ली चेंगगाङले स्पेनको म्याड्रिडमा सम्पन्न चीन–अमेरिका आर्थिक तथा व्यापारिक वार्तामा यस्तो प्रगति भएको जानकारी दिएका हुन्।

वार्तामा टिकटकसँगै लगानी अवरोध घटाउने, पारस्परिक आर्थिक–व्यापारिक सहयोग प्रवर्द्धन गर्ने लगायतका विषयमा दुई देशबीच खुला र गहन छलफल भएको जनाइएको छ।

यस विषयमा चिनियाँ परराष्ट्र मन्त्रालयका प्रवक्ता लिन जियानले राष्ट्रप्रमुखस्तरको कूटनीतिले दुवै मुलुकबीचको सम्बन्धलाई रणनीतिक दिशानिर्देश दिने भन्दै यसको महत्त्वपूर्ण भूमिका रहेको बताए। टिकटकसम्बन्धी विशेष विवरणबारे भने सम्बन्धित निकायले पहिले नै सार्वजनिक गरिसकेको भन्दै उनले थप जानकारी दिन अस्वीकार गरे।

विश्लेषकहरूले चीन–अमेरिका बीच भएको यो प्रारम्भिक सहमतिको रूपरेखालाई हाल बिग्रँदै गएको सम्बन्ध सुधारतर्फको सकारात्मक संकेतका रूपमा व्याख्या गरेका छन्।