बैंक नोट वाहेकका सबै सरकारी कागजपत्र नेपालमै छाप्ने तयारी

काठमाडौं । सरकारले अबदेखि बैंक नोटबाहेकका सम्पूर्ण सरकारी कागजपत्र नेपालमै छाप्ने तयारी गरेको छ।

सरकारका प्रवक्ता तथा सूचना–सञ्चार मन्त्री पृथ्वी सुब्बा गुरुङले हुलाक टिकट, स्मार्ट कार्ड, लालपुर्जा, नागरिकता, राष्ट्रिय परिचय पत्र, पासपोर्टसहित सरकारसँग सम्बन्धित सबै स्टिकर र कागजपत्र अब सुरक्षण मुद्रण केन्द्रमै छापिने व्यवस्था मिलाइएको जानकारी दिए।

आइतबार अठारौं पुस्तकालय दिवस २०८२ को मूल समारोहलाई सम्बोधन गर्दै उनले भने, “गएको वर्षसम्म हुलाक टिकट विदेशमा छापिन्थ्यो। तर यो वर्षदेखि सबै सरकारी कागजपत्र नेपालकै सुरक्षण मुद्रण केन्द्रमार्फत उत्पादन हुन्छ।”

उनले यस वर्ष कर्मचारी व्यवस्थापनमा समस्या भएकाले भिसा कार्ड, हुलाक टिकट र लालपुर्जा जनकशिक्षा सामग्री केन्द्रमार्फत छापिएको उल्लेख गरे। “अहिले कर्मचारी व्यवस्थापनको काम अन्तिम चरणमा छ। एक साताभित्र व्यवस्थापन पूरा भएपछि सबै कागजपत्र सुरक्षण मुद्रण केन्द्रमै छापिन्छन्,”मन्त्री गुरुङले स्पष्ट पारे।

बैंक नोट भने विशेष मेसिन आवश्यक हुने भएकाले बाहिरैबाट मगाउनुपर्ने उनको भनाइ छ।

यससँगै उनले प्रत्येक मन्त्रालय, विभाग र सरकारसँग सम्बन्धित निकायले डकुमेन्ट छाप्नुअघि सूचना तथा सञ्चार मन्त्रालयमार्फत जानकारी दिनुपर्ने प्रावधान रहेको बताए। “जस्तै परराष्ट्र मन्त्रालयले ६४ लाख पासपोर्ट छाप्नुपर्ने माग गरेको छ। यस्ता मागबारे कम्तीमा ६ महिना अगाडि जानकारी गराउनुपर्छ,” उनले चेतावनीस्वरूप भने।