जापानविरुद्धको सैन्य परेडमा ओलीको सहभागिताप्रति पूर्वराजदूत आचार्यको असन्तोष

काठमाडौं । चीनका लागि पूर्व नेपाली राजदूत राजेश्वर आचार्यले प्रधानमन्त्री केपी शर्मा ओली जापानविरुद्धको विजयी परेडमा सहभागी हुन गएकोप्रति असन्तुष्टि व्यक्त गरेका छन्।

शनिबार रिपोर्टर्स क्लब नेपालमा आयोजित साक्षात्कार कार्यक्रममा बोल्दै उनले जापान नेपालका पुराना सहयोगी मुलुकमध्ये एक भएकाले त्यस्तो देशविरुद्धको कार्यक्रममा जानु उपयुक्त नहुने टिप्पणी गरे।

आचार्यले भने, “जापान हाम्रो ठूलो मित्र राष्ट्र हो। इतिहासमा हेर्ने हो भने नेपाल–चीनबीच पनि युद्ध भएको थियो, भारतसँग पनि केही गुनासो छन्। तर जापानले सुरुदेखि नै नेपालको विकासमा सहयोग गर्दै आएको छ। त्यसकारण प्रधानमन्त्रीले जापानविरुद्धको सैनिक परेडमा भाग लिनु मलाई चित्त बुझेको छैन।”

यस अवसरमा उनले भारत र चीनले नेपाललाई बेवास्ता गर्दै लिपुलेक मार्ग व्यापारिक प्रयोजनका लागि प्रयोग गर्ने सहमति गरेकोप्रति पनि आपत्ति जनाए। उनले प्रधानमन्त्री ओलीले यसबारे दुवै मुलुकसँग समन्वय गरी नेपालले आफ्नो धारणा प्रष्ट राख्नुपर्ने आवश्यकता औंल्याए।

पूर्वराजदूत आचार्यले आफू चीनमा कार्यरत रहँदा सन् २००१ मै नेपाललाई शाङ्घाई सहयोग संगठन (SCO) मा सामेल हुन सुझाव दिएको स्मरण गर्दै, नेपाल अहिले पनि पूर्ण सदस्य बन्नुपर्ने बताए। “संगठनमा दुईवटा संयुक्त राष्ट्र संघका भिटो पावर भएका मुलुक छन्। त्यहाँ नेपाल सदस्य बने आर्थिक तथा कूटनीतिक लाभ हुन्छ। अहिले हामी मात्र पर्यवेक्षक भूमिकामा छौं, जुन पर्याप्त होइन,” उनले स्पष्ट पारे।

भारत र चीन आ–आफ्नै सभ्यता भएका मुलुक भए पनि नेपालजस्तो शान्तिप्रिय राष्ट्रको भू–भागलाई मनपरी प्रयोग गर्न नहुने उनको भनाइ छ। उनले भारतले काली नदीको सीमाना तोडमोड गरेको आरोपसमेत लगाए। “लिम्पियाधुराबाट आउने ठूलो नदी नै काली हो भन्ने प्रमाण पुरानो नक्सामा छ। तर अहिले भारतले सानो खोलालाई काली नाम दिएर सीमा सार्ने काम गरेको छ,” उनले दाबी गरे।

उनका अनुसार भारत र चीन दुवैले नेपालको अस्मिता र भू–भागलाई खण्डित गर्ने प्रयास गरिरहेका छन्, जसविरुद्ध नेपालले प्रष्ट आवाज उठाउनुपर्ने हुन्छ। “प्रधानमन्त्री ओलीले खुट्टा नकमाई दुवै मुलुकसँग प्रमाणका आधारमा बहस गर्नुपर्छ। यस्तो बेला पूरै देश प्रधानमन्त्रीको पक्षमा उभिन तयार हुन्छ,”आचार्यले भने।