भदौ १५ गते देशभर श्रद्धाञ्जली कार्यक्रम गर्दै जनमत पार्टी

जनकपुर । जनमत पार्टीले स्वराज आन्दोलनका प्रथम वीर शहीद राम मनोहर यादवको आठौं श्रद्धाञ्जली दिवस भदौ १५ गते देशभर मनाउने भएको छ।

पार्टीका केन्द्रीय प्रवक्ता डा. शरद सिंह यादवले शुक्रबार जारी गरेको सूचनामा आइतबार साँझ ७ बजेदेखि देशव्यापी श्रद्धाञ्जली कार्यक्रम आयोजना गर्न सबै जिल्ला तथा वडा कमिटीलाई निर्देशन दिएका छन्।

कार्यक्रम अन्तर्गत प्रत्येक वडामा, जिल्ला सदरमुकाम र पार्टी कार्यालयमा एकैसाथ शहीद यादवको फोटोमा मैनबत्ती तथा दिप प्रज्वलन गरिने जनमत पार्टीले जनाएको छ।

स्वराज आन्दोलनका क्रममा तत्कालीन उपप्रधानमन्त्री उपेन्द्र यादवलाई कालो झण्डा देखाउने क्रममा पक्राउ परेका राम मनोहर यादवको हत्या गरिएको थियो। उनी जनमत पार्टीका एक मात्र शहीद मानिन्छन्।