चीन र भारत भ्रमण स्थगन गरी अतिक्रमित भूमि फिर्ता गर्न कदम चाल्न प्रधानमन्त्री ओलीलाई सात कम्युनिष्ट घटकहरुको सुझाव

भारत र चीनबीच लिपुलेक तथा कालापानी हुँदै व्यापारिक मार्ग सञ्चालन गर्ने सहमतिको विरोधमा सात वटा कम्युनिस्ट घटकहरु एकजुट भएका छन्।

नेपाल कम्युनिस्ट पार्टी (संयोजक बसन्त), श्रमिक जनता पार्टी (अध्यक्ष दुर्गा बराईली), समाजवादी कम्युनिस्ट पार्टी नेपाल (स्थायी समिति सदस्य माधव गौतम), ग्रेटर नेपाल कम्युनिस्ट पार्टी (संयोजक मुक्ति), नेपाल कम्युनिस्ट पार्टी (क्रान्तिकारी) (महासचिव अरुण घिसिङ), नेकपा (विद्रोही) (प्रवक्ता प्रतिवाद) र नयाँ जनवादी मोर्चा (संयोजक शम्भु कट्टेल) ले संयुक्त पत्रकार सम्मेलन गर्दै उक्त सहमतिको कडा आपत्ति जनाएका हुन्।

सातै संगठनले ऐतिहासिक तथ्य र अन्तर्राष्ट्रिय नक्सामा कालापानी–लिपुलेक नेपालको अविभाज्य अंग भएको प्रष्ट भए पनि भारतले निरन्तर अतिक्रमण र हस्तक्षेप गर्दै आएको आरोप लगाएका छन्। ‘भारत–चीनबीच भएको यस किसिमको सम्झौता नेपालको राष्ट्रिय स्वाधीनता, सार्वभौमसत्ता र अखण्डतामाथि आघात पुर्‍याउने कदम हो,’ विज्ञप्तिमा उल्लेख गरिएको छ।

यसबारे अन्तर्राष्ट्रिय समुदायको ध्यानाकर्षण गराउँदै उनीहरूले प्रधानमन्त्री केपी शर्मा ओलीको आसन्न भारत र चीन भ्रमण स्थगित गर्न, अतिक्रमित भूमि फिर्ता ल्याउन र राष्ट्रिय स्वाधीनता तथा अखण्डताको दृढ रक्षा गर्न सरकारलाई आग्रह गरेका छन्।

सातै कम्युनिस्ट घटकले उक्त सम्झौताविरुद्ध प्रतिरोधमा उत्रिन सबैलाई आह्वान गर्दै भदौ १३ गते विरोध प्रदर्शन गर्ने घोषणा गरेका छन्।