आईटी जनशक्तिलाई दुई लाखसम्म तलबको व्यवस्था : प्रधानमन्त्री ओली

काठमाडौं । प्रधानमन्त्री केपी शर्मा ओलीले सूचना प्रविधि (आईटी) क्षेत्रमा कार्यरत दक्ष जनशक्तिलाई सरकारले अधिकतम दुई लाख रुपैयाँसम्म तलब दिने व्यवस्था गरेको बताएका छन्।

बिहीबार सामाजिक सञ्जालमार्फत उनले यो कदमले सरकारी सेवामा अनलाइन प्रणाली विस्तार गर्दा ढिलासुस्ती, घुस र कमिसनको प्रवृत्ति नियन्त्रण हुने विश्वास व्यक्त गरे। साथै, आईटी क्षेत्रमा दक्ष जनशक्ति विदेश पलायन हुनबाट रोक्ने अपेक्षा समेत उनले राखेका छन्।

ओलीले भनेका छन्, “आईटी क्षेत्रमा दक्ष जनशक्तिलाई सरकारले दुई लाख रुपैयाँसम्म तलबको व्यवस्था गरेको छ। यसले सफ्टवेयर प्रणाली विकासको लागतलाई यथार्थपरक बनाउनेछ र आईटी पढेका युवाहरूका लागि उत्साहजनक अवसर बन्नेछ।”