नाडा अटो शो मा चर्चित बनेको ‘फ्लाइङ ट्याक्सी’ नउडाई फिर्ता पठाइयो

काठमाडौं । ‘नाडा अटो शो २०२५’ मा पहिलोपटक प्रदर्शन गरिएको फ्लाइङ ट्याक्सी चर्चाको मुख्य आकर्षण बने पनि उडाउन अनुमति नपाएर फेरि फिर्ता पठाइएको छ।

भदौ ३ देखि ८ गतेसम्म चलेको शोमा देखाइएको फ्लाइङ ट्याक्सी नेपालमै पहिलो ईभीटीओएल (इलेक्ट्रिक भर्टिकल टेक–अफ एन्ड ल्यान्डिङ) प्रविधिको नमुना थियो। नयाँ प्रविधि देख्न उत्साहित सर्वसाधारण, बालबालिकादेखि बृद्धासम्मको भीड ट्याक्सी हेर्न पुगेको थियो।

के हो फ्लाइङ ट्याक्सी?

शोमा प्रतिनिधित्व गरिरहेकी लक्ष्मी घिमिरेका अनुसार फ्लाइङ ट्याक्सी चीनको चांगान अटोमोबाइल र विश्वप्रसिद्ध एरियल भेहिकल निर्माता इह्याङले संयुक्त रूपमा तयार पारेको हो।
यो पूर्णतया विद्युतीय प्रविधिमा आधारित छ, जसले एकपटक चार्जपछि ५० किलोमिटरसम्म उडान गर्न सक्छ। दुई जना यात्रु बोक्ने क्षमता भएको यस ट्याक्सीले पाइलट बिना अटो–पाइलट मोडमा उडान तथा अवतरण गर्न सक्ने सुविधा पनि राख्छ।

किन उडाउन पाइएन?

नाडा कार्यसमिति सदस्य मेघराज पौडेलका अनुसार फ्लाइङ ट्याक्सी केवल प्रदर्शनका लागि चीनबाट धरौटीमा ल्याइएको थियो। नेपालमा यसको प्रयोगलाई लिएर कुनै कानुन वा नीति नबनेको कारण उडाउन सम्भव नभएको बताए।
उनका अनुसार अब यस विषयमा नीतिगत बहस सुरु गर्नुपर्ने आवश्यकता देखिएको छ। “भोलिका दिनमा यसलाई रेस्क्यु वा छोटो दूरीको यात्रामा प्रयोग गर्न सकिन्छ, त्यसैले अब नीति निर्माणतर्फ काम थाल्नुपर्छ,” पौडेलले भने।

नेपालमा यातायातको विकल्प बन्ने सम्भावना

ड्रोन हवका निर्देशक प्रवीण भट्टराईका अनुसार ‘फ्लाइङ ट्याक्सी’ नेपालमा भविष्यमा उत्कृष्ट यातायात विकल्प बन्न सक्छ। यसले पर्यटन प्रवद्र्धनमा मात्र नभई ‘फ्लाइङ एम्बुलेन्स’ को रूपमा पनि ठूलो भूमिका खेल्न सक्ने उनको भनाइ छ।
“नेपालमा हिमाली भेगमा ढुवानीका लागि पनि यस प्रविधि उपयोगी हुन सक्छ। तर यसलाई सञ्चालन गर्न अन्तर्राष्ट्रिय स्वीकृति आवश्यक पर्छ,” उनले भने।

आवश्यक पूर्वाधार

भट्टराईका अनुसार फ्लाइङ ट्याक्सीका लागि हेलिप्याडजस्तै ‘भर्टिपोर्ट’ आवश्यक पर्छ। साथै, आकाशमार्गमा सुरक्षित यातायात सुनिश्चित गर्न ‘अनम्यान्ड ट्राफिक म्यानेजमेन्ट’ प्रणाली पनि अपरिहार्य हुने उनको भनाइ छ।