समाजवादको आधारका लागि सदाचार नीति आवश्यक : अध्यक्ष दाहाल

काठमाडौं । राष्ट्रिय सभाका अध्यक्ष नारायण प्रसाद दाहालले संविधानले परिकल्पना गरेको समाजवादलाई साकार पार्न सदाचार नीति ल्याउन लागिएको बताएका छन्।

बुधबार संसदको विकास तथा आर्थिक समितिमा बोल्दै अध्यक्ष दाहालले जनताको गास, बास, रोजगारी, शिक्षा र स्वास्थ्यमा पूर्ण पहुँच सुनिश्चित गर्न सदाचार नीति आवश्यक रहेको स्पष्ट पारे।

उनका अनुसार धार्मिक भाषामा ‘राम राज्य’ भन्ने वा कतिपय दलले ‘साम्यवाद’ भन्ने विषय मूलतः जनताको आधारभूत आवश्यकतामा पहुँच दिलाउनु हो। “हामीसँग केही चुनौती र जटिलता छन्, ती हटाएर समाज निर्माण गर्न सदाचार नीति ल्याउन खोजिएको हो,” दाहालले भने।

राजनीतिमा नै सदाचार नीति कायम गर्न सके कानुन निर्माणदेखि आर्थिक व्यवस्थापन र विकासका काम सहज हुने उनको भनाइ छ।
“सबैभन्दा पहिले राजनीतिक क्षेत्रमै सदाचार स्थापित हुनुपर्छ। राजनीति शुद्ध भए त्यसैबाट अरु प्रणालीहरू — कानुन, अर्थतन्त्र, विकास निर्माण सबै सही दिशामा जान्छन्,” दाहालले उल्लेख गरे।