अमेरिकाले भारतीय बस्तुमा आजदेखि ५० प्रतिशत कर लगायो

संयुक्त राज्य अमेरिकाले भारतबाट आयात हुने विभिन्न वस्तुमा आजदेखि कुल ५० प्रतिशत आयात कर लगाएको छ।

अमेरिकी सरकारको सूचनाअनुसार २७ अगस्ट बिहान ९:३० बजेदेखि लागू हुने गरी भारतका सामानमा थप २५ प्रतिशत कर थपिएको हो। यसअघि नै २५ प्रतिशत शुल्क लगाइँदै आएकाले हाल कर दर ५० प्रतिशत पुगेको हो।

नयाँ कर व्यवस्थाअनुसार कपडा, गहना, छाला उत्पादन, मेसिनरी, फर्निचर र समुद्री पदार्थमा थप शुल्क लाग्नेछ भने औषधि, इस्पात, तामा, एल्युमिनियम र यात्रुवाहक सवारी साधन भने यसबाट बाहिर रहनेछन्। अमेरिकी राष्ट्रपति डोनाल्ड ट्रम्पले अगस्ट ६ मा जारी कार्यकारी आदेशमार्फत भारतले रुसबाट सस्तो मूल्यमा पेट्रोलियम खरिद गरेको आरोप लगाउँदै यो कदम चालेका हुन्।

भारतीय उद्योगी तथा निर्यातकर्ताले अमेरिकी निर्णयले निर्यातमा तीव्र गिरावट ल्याउने चेतावनी दिएका छन्। उनीहरूले नाफा र रोजगारी दुवै प्रभावित हुने बताए। भारतको वाणिज्य मन्त्रालयले निर्यातकर्तालाई संरक्षण गर्ने पहल गर्ने आश्वासन दिएको भए पनि अमेरिकाविरुद्ध कुनै प्रतिशोधात्मक कदम हालसम्म नचालिएको जनाएको छ।

प्रधानमन्त्री नरेन्द्र मोदीले किसान र साना व्यवसायीलाई असर नपर्ने गरी समाधान खोजिने प्रतिबद्धता जनाएका छन्। रिजर्भ बैंकका गर्भनरले नयाँ शुल्कले भारतीय अर्थतन्त्रमा ठूलो प्रभाव नपर्ने विश्वास व्यक्त गरेका छन्। यस्तै, विदेशमन्त्री एस. जयशंकरले अमेरिकी कदमलाई “अन्यायपूर्ण र अव्यावहारिक” भन्दै भारत सम्झौता गर्न तयार नभएको स्पष्ट पारेका छन्।