नेपालमा पहिलोपटक ‘नेपाल आर्ट एण्ड कल्चर फेस्टिवल–२०२५'

काठमाडौं ।
नेपाल पर्यटन बोर्ड र नेपाल आर्ट काउन्सिलले काठमाडौं उपत्यकाका चार महानगरपालिकासँग सहकार्य गर्दै नेपालमा पहिलोपटक ‘नेपाल आर्ट एण्ड कल्चर फेस्टिवल–२०२५’ आयोजना गर्ने घोषणा गरेका छन्।

आइतबार पर्यटन बोर्डको सभाहलमा पत्रकार सम्मेलन गर्दै आयोजकले फेस्टिवल आगामी भदौ २० गतेदेखि असोज १० गतेसम्म काठमाडौं, ललितपुर, भक्तपुर र कीर्तिपुरमा सञ्चालन हुने जानकारी दिएका हुन्।

सांस्कृतिक धरोहरलाई अन्तर्राष्ट्रिय मञ्चसम्म पुर्‍याउने लक्ष्य

नेपाल आर्ट काउन्सिलका अध्यक्ष सागर शमशेर राणाले फेस्टिवलको उद्देश्य नेपालमा मात्र नभई अन्तर्राष्ट्रिय स्तरमै सांस्कृतिक वैभवलाई उजागर गर्नु रहेको बताए। उनका अनुसार कार्यक्रमले स्वदेशी तथा विदेशी पर्यटक दुवैलाई आकर्षित गर्ने लक्ष्य राखिएको छ।

साहसिक पर्यटनसँगै सांस्कृतिक वैभव

नेपाल पर्यटन बोर्डका प्रमुख कार्यकारी अधिकृत दीपकराज जोशीले नेपाल प्रायः साहसिक पर्यटनको गन्तव्यका रूपमा चिनिए पनि यो महोत्सवले नेपाललाई सांस्कृतिक सम्पदाको खजानाका रूपमा विश्वसामु प्रस्तुत गर्ने बताए।
उनले भने, “हाम्रो संस्कृति र धरोहरलाई जगेर्ना गर्दै विश्वव्यापी रूपमा चिनाउनुपर्छ। यस किसिमको महोत्सवले पर्यटन प्रवर्द्धनसँगै आर्थिक लाभ पनि दिनेछ।”

"लाइफटाइम एक्सपेरियन्स" को अवसर

नेपाल होटल व्यवसायी संघ (हान) का अध्यक्ष तथा फेस्टिवल सञ्‍चालन समितिका प्रमुख विनायक शाहले नेपाललाई ‘लाइफटाइम एक्सपेरियन्स’ को लागि उत्कृष्ट गन्तव्यको संज्ञा दिंदै यस महोत्सवले एक्सपेरिमेन्टल टुरिज्ममा नयाँ ढंगले योगदान गर्ने विश्वास व्यक्त गरे।

इन्द्रजात्रासँगै सुरु हुने महोत्सव

कार्यक्रम संयोजक आयुषा श्रेष्ठका अनुसार महोत्सव तीन सातासम्म चल्नेछ र यस अवधिमा ४० वटा विभिन्न कार्यक्रमहरू आयोजना गरिनेछ। इन्द्रजात्राको अवसरसँगै सुरु हुने यो उत्सवलाई उपत्यकाका सम्पदा, कला र संस्कृति एकैसाथ प्रस्तुत गर्ने महोत्सवका रूपमा तयार गरिएको हो।

विविध सांस्कृतिक आकर्षण

“नेपालको शाश्वत कला, संस्कृति, खानपान र सम्पदाको उत्सव” भन्ने नारासहित आयोजना हुने फेस्टिवलमा सांस्कृतिक प्रदर्शनी, कला–कौशल, संगीत, नृत्य, परम्परागत परिकार तथा जीवित संस्कृतिको प्रत्यक्ष अनुभव गर्ने अवसर रहनेछ।

आयोजकका अनुसार, उपत्यकाका चारवटै पुराना शहर–काठमाडौं, पाटन, भक्तपुर र कीर्तिपुरलाई उत्सवमय बनाउन अन्तिम तयारी पूरा भएको छ। साथै, राष्ट्रिय फोटो पत्रकार समूहले फोटो प्रदर्शनीमार्फत महोत्सवलाई देश–विदेशमा प्रचार–प्रसार गर्न सहयोग गर्ने जनाएको छ।