नेभिगेशन
संस्कृति

थारू समुदायले अटवारी पर्व धुमधामसँग मनाउँदै, लुम्बिनी प्रदेशमा सार्वजनिक बिदा

दाङ – पश्चिम तराईका थारू समुदायले आज (भदौ ८) विभिन्न सांस्कृतिक कार्यक्रमसहित अटवारी पर्व मनाइरहेका छन्। हिन्दुहरूको तीज जस्तै महत्त्वपूर्ण मानिने यो पर्व थारू समुदायका लागि विशेष स्थान राख्छ।

यस पर्वको परम्पराअनुसार शुक्रबार (भदौ ६) राति दर खाई व्रत सुरु गर्ने र शनिबार दिनभरि व्रत बसेपछि साँझपख रोटी पकाई दही, फलफूललगायतका परिकार देवतालाई चढाएर मात्र खाने प्रचलन छ। आइतबार बिहान भात–तरकारी पकाई पुनः अग्रासन (देउतालाई चढाउने अर्पण) दिएकोपछि मात्र खाने गरिन्छ।

घोराही–१७ की थारू अगुवा सरस्वती चौधरीका अनुसार, अटवारीमा दाजुभाइले दिदीबहिनीको दीर्घ आयु र सौभाग्यको कामना गर्दै व्रत बस्ने चलन रहिआएको छ। “यो पर्व हाम्रो समुदायमा अत्यन्तै महत्त्वपूर्ण छ,” उनले भनिन्।

यसैगरी घोराही–३ का सुरज चौधरी भन्छन्, “कुसेऔँसीपछिको पहिलो आइतबार मनाइने अटवारीमा दाजुभाइले व्रत बसेर दिदीबहिनीलाई कोसेली पुर्‍याउँछन्। यसले दाजुभाइ–दिदीबहिनीबीचको सम्बन्ध अझ प्रगाढ हुन्छ।”

इतिहास र पौराणिक कथासँग पनि अटवारी पर्व जोडिएको छ। थारू संस्कृतिविद् अशोक चौधरीका अनुसार, महाभारतकालमा दाङका थारू राजा दंगीशरणलाई आक्रमणबाट बचाउन पाण्डव भीमले रोटी पकाउँदै गरेको छाडेर भोकै पेटमा लडेका थिए। शत्रुलाई हराएपछि विजयोत्सवस्वरूप अटवारी मनाउन थालिएको मानिन्छ। त्यसै स्मरणमा थारू पुरुषले आज पनि पानीसम्म नखाई व्रत बस्ने गर्छन्।

यसैबीच, लुम्बिनी प्रदेश सरकारले थारू समुदायको बर्का अटवारी पर्वका अवसरमा आज सार्वजनिक बिदा दिएको छ। दाङ, बाँके, बर्दिया, रूपन्देही, कपिलवस्तु र पश्चिम नवलपरासीमा बसोबास गर्ने थारू समुदायलाई लक्षित गर्दै आन्तरिक मामिला तथा कानुन मन्त्रालयले बिदाको सूचना जारी गरेको हो।

प्रकाशित मिति:
प्रतिक्रिया दिनुहोस्