दाङमा थारु समुदायले उल्लासपूर्वक अष्टम्की पर्व मनाउँदै

दाङ । श्रीकृष्ण जन्माष्टमीको अवसरमा दाङसहित पश्चिम तराईका थारु समुदायले आज अष्टम्की पर्व उत्साहपूर्वक मनाइरहेका छन् ।

यस पर्वमा विशेषगरी थारु महिलाहरू दिनभर व्रत बस्ने गर्छन् र बेलुकी कृष्णसँग सम्बन्धित भजन तथा गीत गाएर खुसी साट्ने परम्परा रहँदै आएको छ ।

यस दिन थारु समुदायले गाउँको महतवाको घरमा कृष्ण र पाण्डवसँग सम्बन्धित चित्रहरू कोर्ने प्रचलन छ । थारुहरू प्रकृतिप्रेमी भएकाले घरका भित्तामा कृष्ण, पाण्डवसँगै प्रकृतिका जीवजन्तुको पनि चित्र अंकन गरिन्छ भन्ने जानकारहरूको भनाइ छ ।

पर्वको दिन नुहाइधुवाइ गरी शुद्ध भई महतवाको घरमा सबै भेला हुने गर्छन् । साँझतिर भित्तामा बनाइएका चित्रहरूको सामूहिक पूजा गर्ने परम्परा रहेको छ । थारु अगुवाहरूका अनुसार यी चित्रहरूले थारु समुदायको कृष्ण र पाण्डवसँगको आध्यात्मिक सम्बन्धलाई प्रतीकात्मक रूपमा देखाउँछन् ।