काठमाडौं । सुधार आन्दोलन नेपालले सरकारले राजनीतिक दलहरूलाई राज्य कोषबाट अनुदान दिने तयारीमा आपत्ति जनाएको छ। आज काठमाडौंमा आयोजित कार्यक्रममा संगठनले सार्वजनिक रकम पार्टीहरू सञ्चालनमा प्रयोग गर्न नहुने स्पष्ट पारेको हो।
कार्यक्रममा बोल्दै सुधारवादी अभियन्ता बोधराज न्यौपानेले सरकार राजनीतिक दलहरूलाई सरकारी ढुकुटीबाट पैसा उपलब्ध गराउने कानुन ल्याउने तयारीमा रहेको आरोप लगाए। उनले भने, “सरकारी अनुदानको भरमा दल चलाउने व्यवस्था गर्न लागिएको छ, जसको हामी घोर विरोध गर्छौं। यस्तो कानुन नेपाली जनताले स्वीकार्दैनन्।”
उनले जनताको करबाट संकलन भएको रकम दल चलाउन प्रयोग गर्नु अनुचित भएको बताउँदै यसप्रकारको कानुनी प्रयास जनभावनाविपरीत भएको तर्क गरे।
त्यस्तै, अर्का वक्ता डा. सुशिल पौडेलले राजनीतिक दलसम्बन्धी ऐन संशोधनको तयारीप्रति आपत्ति जनाउँदै दल र निर्वाचन खर्चका लागि राज्यले पैसा दिनु नहुने बताए। उनले प्रस्तावित संशोधनले नयाँ दल खोल्न कठिन बनाउने र राष्ट्रिय पार्टी बन्ने मापदण्डलाई अत्यन्त कडाइका साथ प्रस्तुत गरिने बताए।
“यसरी बनाइने व्यवस्था लोकतान्त्रिक प्रक्रियाविपरीत हुन्छ। यसको सबैले विरोध गर्न जरुरी देखिन्छ,” डा. पौडेलले भने।
संगठनका संयोजक डा. गोपीलाल न्यौपानेले सुधार आन्दोलन नेपालले राजनीतिक, सामाजिक र आर्थिक सुधारमा विश्वास राख्ने संस्था भएको उल्लेख गरे। उनले निर्वाचन आयोगद्वारा राजनीतिक दलहरूको लागि ल्याइएको स्वमूल्याङ्कन कार्यविधि त्रुटिपूर्ण रहेको बताए।
उनले भने, “जबसम्म नीतिगत स्तरमै कठोरता अपनाइँदैन, जबसम्म जनताको पक्षमा नीतिहरू निर्माण हुँदैनन्, तबसम्म नेपाली समाजमा वास्तविक रूपान्तरण सम्भव छैन। माथिबाट तलसम्म परिवर्तन ल्याउनु अत्यावश्यक छ।”
