२२औं श्रृजनशील उद्यमी मेला साउन २२ देखि २५ गतेसम्म काठमाडौंमा आयोजना हुने

काठमाडौं, साउन १९ – २२औं श्रृजनशील उद्यमी मेला काठमाडौंको बालुवाटारस्थित आम्रपाली ब्याङ्क्वेटमा साउन २२ गतेदेखि २५ गतेसम्म आयोजना हुने भएको छ।

मेलाबारे आइतबार आयोजित पत्रकार सम्मेलनमा आयोजक संस्था सृजनशील केन्द्रले रायजिङ नेपाल प्रा.लि.सँगको सहकार्यमा र इभेन्ट सञ्चार डट कमको व्यवस्थापनमा मेला सञ्चालन गरिने जानकारी दिएको हो।

चार दिनसम्म चल्ने मेलाको मुख्य प्रायोजक डाबर नेपाल रहेको छ भने उद्घाटन समारोहमा उद्योग मन्त्री दामोदर भण्डारी प्रमुख अतिथि रहने आयोजकले जनाएका छन्।

मेलाको उद्देश्य महिलाहरूलाई सीपयुक्त बनाउँदै स्वरोजगार तथा उद्यमशीलतातर्फ प्रोत्साहित गर्नुका साथै प्रविधिमैत्री वातावरण निर्माण गरी उनीहरूलाई आर्थिकरूपमा सशक्त बनाउनु रहेको बताइएको छ।

गत २२ वर्षदेखि सञ्चालनमा आइरहेको श्रृजनशील मेला मार्फत सयौं महिलाहरू स्वरोजगारमा प्रेरित भएका छन्। सृजनशील केन्द्रका अनुसार हालसम्म ५०० भन्दा बढी महिलाहरूले सीपमूलक तालिम लिई आफ्नै व्यवसाय सञ्चालन गरिरहेका छन्।

महिला सृजनशील केन्द्रकी अध्यक्ष मिलु थापाले मेला महिलाहरूलाई उद्यमशील बनाउने मार्गमा महत्वपूर्ण माध्यम हुने विश्वास व्यक्त गरिन्। उनले सरकारी तथा निजी साझेदारहरूको सहकार्यमा महिलाहरूलाई बजारसम्म पुर्‍याउन मेला उपयोगी हुने बताइन्।

मेलामा १०० भन्दा बढी स्टलहरू रहनेछन्। राइजिङ नेपालका प्रमुख पशुपति केसीका अनुसार प्रदर्शनीमा महिला सृजनासँग सम्बन्धित हस्तकला, घरेलु उद्योगका सामग्री, सामाजिक संघ–संस्थाहरू, महिला बचत समूह तथा प्रविधिमैत्री संस्थाहरू सहभागी हुनेछन्।

दर्शकको रूपमा महिला दिदीबहिनीहरू, नयाँ व्यवसाय सुरु गर्न इच्छुक व्यक्ति, विद्यार्थी, पत्रकार, कलाकार, सरकारी प्रतिनिधि, राष्ट्रिय तथा अन्तर्राष्ट्रिय पर्यटकहरूको सहभागिता अपेक्षित गरिएको छ।

मेलाको मुख्य आकर्षणहरूमा घरेलु तथा हस्तकलाका सामग्रीहरू, महिला उद्यमीका उत्पादन तथा सेवा, तीज विशेष परिकारहरू, निःशुल्क स्वास्थ्य परीक्षण, मेहेन्दी सेवा, सफ्टवेयर प्रदर्शनी र विशेष उपहार व्यवस्थाजस्ता गतिविधिहरू समावेश गरिएको छ। आयोजकले ५ वटा भन्दा बढी स्टलहरू ग्रामीण, अशक्त र असहाय महिला उद्यमीहरूलाई निःशुल्क रूपमा उपलब्ध गराउने जानकारी दिएको छ।