मोदीको कार्यकालमा भारतले आकर्षक प्रगति गरेको छ : पूर्वराजदूत मोहन कृष्ण श्रेष्ठ

पूर्वराजदूत मोहन कृष्ण श्रेष्ठले भारतले पछिल्ला वर्षहरूमा विशेषगरी ‘कनेक्टिभिटी’ को क्षेत्रमा उल्लेखनीय सफलता हासिल गरेको बताएका छन्। काठमाडौंमा आयोजित साक्षात्कार कार्यक्रममा बोल्दै उनले भारतमा प्रतिघण्टा ३०० किलोमिटरको गतिमा दौडिने रेल सेवा सुरु भइसकेको उल्लेख गरे।

उनका अनुसार भारतले विकासको क्रममा नेपालजस्तो छिमेकी मुलुकलाई विश्वासमा लिएर अघि बढ्नुपर्ने आवश्यकता अझै कायम छ। यद्यपि नेपाल–भारत सम्बन्ध ऐतिहासिक र गहिरो भए पनि समय–समयमा केही समस्या देखिने गरेको उनले स्वीकार गरे। ती समस्याहरू उच्चस्तरीय संवाद र कूटनीतिक पहलबाट समाधान गर्न सकिने धारणा उनले व्यक्त गरे।

प्रधानमन्त्री केपी शर्मा ओलीको आसन्न भारत भ्रमणप्रति सकारात्मक प्रतिक्रिया जनाउँदै श्रेष्ठले नेपालको तर्फबाट स्पष्ट र सशक्त ढंगले आफ्ना विषयहरू राख्नुपर्ने बताए। “भ्रमणका क्रममा टेबल टक्समा दुबै पक्षले आफ्नो-आफ्नो धारणा खुला रूपमा राख्न पाउनु जरुरी छ, समस्याको समाधानको मूल बाटो यही हो,” उनले भने।

धार्मिक पर्यटनको सम्भावनाबारे पनि चर्चा गर्दै श्रेष्ठले नेपालमा पशुपतिनाथ, मुक्तिनाथ र अन्य मठ–मन्दिरजस्ता स्थलहरू भारतीय पर्यटकका लागि आकर्षण बन्न सक्ने बताए। “धार्मिक दृष्टिकोणले हेर्दा नेपालमा भारतीय पर्यटकहरूलाई बोलाउने ठाउँ धेरै छन्,” उनले भने, “मैले त भारतीयहरूले नेपाललाई संसारकै राम्रो गन्तव्य भनेर प्रचार गरेको पनि देखेको छु।”

भारतको बढ्दो आर्थिक क्षमताका कारण भारतीय पर्यटकले लाखौं रुपैयाँ खर्च गर्न सक्ने भन्दै उनले नेपालले यो अवसर सदुपयोग गर्नुपर्ने धारणा राखे। भारतले अहिले विश्वमा आफ्नो प्रभाव विस्तार गरिरहेको उल्लेख गर्दै उनले नेपालको कूटनीतिक प्राथमिकतामा ‘छिमेकी पहिला’ नीतिलाई अघि सार्नुपर्ने बताए।

त्यस्तै, आतङ्कवाद भारतका लागि प्रमुख चुनौती रहेको उल्लेख गर्दै श्रेष्ठले नेपालले यसबारेमा भारतसँग विश्वासिलो सन्देश दिनुपर्ने सुझाव दिए। साथै, सीमा क्षेत्रमा रहेका समस्याहरू समाधानका लागि पनि दुवै देशले पहल गर्नुपर्ने उनले स्पष्ट पारे।

“नेपाल र भारतबीच रोटी–बेटीको सम्बन्ध छ,” उनले जोड दिए, “भारतले यस्तो सम्बन्ध भएको देशलाई साना–साना कुरामा अल्झाउनु हुँदैन। दिल्लीको सोच अझ फराकिलो हुनुपर्छ।”

उनले अन्त्यमा भारतजस्तो विशाल बजार भएको मुलुकसँग व्यापार विस्तार गरेर नेपालले आर्थिक लाभ लिन सक्ने सम्भावना औंल्याए र दुई देशबीच सधैं सकारात्मक र सहकार्ययुक्त सम्बन्ध रहनु आवश्यक रहेको बताए।