भारत प्रविधि र विकासमा अगाडि, नेपालले लाभ लिन सक्नुपर्छ : परराष्ट्रविद् मोहन लोहनी

परराष्ट्र मामिलाका विज्ञ मोहन लोहनीले छिमेकी भारत विकास र प्रविधिको क्षेत्रमा निकै अघि बढिसकेको बताउँदै नेपालले त्यसबाट लाभ उठाउनुपर्ने सुझाव दिएका छन्। काठमाडौंमा आयोजित साक्षात्कार कार्यक्रममा बोल्दै उनले भारतको अनुभव मात्र होइन, त्यसले प्रयोग गरिरहेको प्रविधिबाट पनि नेपालले धेरै सिक्न र उपयोग गर्न सक्ने बताए।

“भारत अहिले विकास र प्रविधिमा धेरै अगाडि पुगेको छ,” उनले भने, “त्यहाँको प्रविधि र अनुभवबाट नेपालले धेरै लाभ लिन सक्छ, त्यसतर्फ हाम्रो ध्यान केन्द्रित हुन आवश्यक छ।”

साथै, प्रधानमन्त्री केपी शर्मा ओलीको आसन्न भारत भ्रमणप्रति पनि उनले आशा व्यक्त गरे। भ्रमणले दुई देशबीचका असमझदारीहरू समाधान गर्ने अवसर दिन सक्ने उनको भनाइ थियो।

“निकट भविष्यमै प्रधानमन्त्रीको भारत भ्रमण हुँदैछ,” उनले भने, “दुवै पक्षका नेतृत्वबीच संवादमार्फत नमिलेका विषयहरू समाधान हुने विश्वास छ।”