धारा ३७० हटेपछि कश्मिरमा पर्यटन र लगानी बढेको डा. निश्चलनाथ पाण्डेको भनाइ

परराष्ट्र मामिलाका विज्ञ डा. निश्चलनाथ पाण्डेले भारतको संविधानबाट धारा ३७० हटेपछि जम्मु–कश्मिरमा पर्यटकीय गतिविधि र लगानीमा उल्लेख्य वृद्धि भएको बताएका छन्। उनले यस परिवर्तनसँगै नेपाली युवाहरू समेत रोजगारीका लागि कश्मिर पुग्न थालेको जानकारी दिए।

काठमाडौंमा आयोजित ‘नेपाल–भारत सम्बन्ध र प्रधानमन्त्री केपी शर्मा ओलीको आसन्न भारत भ्रमण’ सम्बन्धी विशेष साक्षात्कार कार्यक्रममा बोल्दै उनले भारत सरकारले सुरक्षा संवेदनशीलतालाई गम्भीर रूपमा लिएको उल्लेख गरे। उनले कश्मिरमा आतंकवादी आक्रमण वा उत्तराखण्डमा बाढीका घटनामा नेपाली नागरिकको ज्यान जाने गरेको तथ्य पनि प्रस्तुत गरे।

डा. पाण्डेले प्रधानमन्त्री ओलीको आसन्न भारत भ्रमणबारे सुझाव दिँदै स्थलमार्ग प्रयोग गरेर जानु उपयुक्त हुने धारणा राखे। “स्थलमार्गबाट भ्रमण गर्दा प्रधानमन्त्रीज्यूले उत्तर प्रदेशमा भइरहेको रेल तथा सडक पूर्वाधारको तीव्र विकास अवलोकन गर्न सक्नुहुन्छ,” उनले भने।

नेपाल–भारत सम्बन्ध राजनीतिक, धार्मिक, सांस्कृतिक, शैक्षिक र आर्थिक रूपमा अत्यन्त नजिक रहेको उल्लेख गर्दै उनले भ्रमणपूर्व नै दुवै देशबीचको द्विपक्षीय संयन्त्रलाई सक्रिय बनाउनुपर्ने आवश्यकता औंल्याए।