नेपाल–भारत सम्बन्ध गहिरो र मैत्रीपूर्ण: कूटनीतिज्ञ डा. शम्भुराम सिम्खडा

परराष्ट्र मामिलाका जानकार तथा वरिष्ठ कूटनीतिज्ञ डा. शम्भुराम सिम्खडाले नेपाल र भारतबीचको सम्बन्ध अत्यन्त गहिरो, सुमधुर र सभ्यतामूलक रहेको बताएका छन्। काठमाडौंमा आयोजित एक साक्षात्कार कार्यक्रममा बोल्दै उनले दुई देशबीच देखिएका कुनै पनि समस्याको समाधान उच्चस्तरीय संवादमार्फत खोजिनु पर्ने आवश्यकता औंल्याए।

उनका अनुसार नेपाल–भारत सम्बन्ध ऐतिहासिक, सांस्कृतिक, सभ्यतामूलक र भूगोलमा आधारित रहेको छ। दुवै मुलुकका कूटनीतिज्ञ तथा राजनीतिज्ञहरूले सम्बन्धको विशेषतालाई ध्यानमा राख्दै पारस्परिक विश्वास र समझदारीमा आधारित कूटनीतिक व्यवहार गर्नु आवश्यक रहेको उनले बताए।

“समस्या आउन नदिनु नै कूटनीतिको मूल उद्देश्य हो,” डा. सिम्खडाले भने, “यदि कुनै समस्याहरू देखापरे भने तीलाई सकेसम्म चाँडो समाधान गर्नु अत्यावश्यक छ।”

उनले हाल भारत भ्रमणको तयारीमा रहेको प्रधानमन्त्री केपी शर्मा ओलीको सम्भावित भ्रमणलाई समेत उल्लेख गर्दै भ्रमणले दुई देशबीचको विश्वासलाई थप सुदृढ बनाउने वातावरण तयार गर्नुपर्ने धारणा राखे।

“भारत–नेपाल सम्बन्ध निकै संवेदनशील र व्यापक छ,” उनले थपे, “यदि केही अविश्वासका संकेतहरू छन् भने, आगामी भ्रमणमार्फत ती विषयहरू कूटनीतिक तरिकाबाट समाधान गर्ने अवसरको रूपमा लिनुपर्छ।”