काठमाडौंमा धुमधामका साथ मनाइयो पश्चिमी थारु समुदायको गुरही पर्व

काठमाडौं, असार १३ – पश्चिम नेपालका थारु समुदायले विशेष महत्वका साथ मनाउने गुरही पर्व राजधानी काठमाडौंमा पनि भव्य रूपमा सम्पन्न भएको छ। मंगलबार नेपाल पर्यटन बोर्ड, भृकुटीमण्डपमा आयोजित कार्यक्रममार्फत यस वर्षको गुरही पर्व उल्लासपूर्वक मनाइएको हो।

अग्रासन थारु महिला समूहको नेतृत्वमा करिब एक दर्जन थारु संघसंस्थाको संयुक्त आयोजनामा सम्पन्न भएको कार्यक्रममा पूर्व पर्यटन राज्यमन्त्री अरुण चौधरी, थारु कल्याणकारिणी सभाका केन्द्रिय अध्यक्ष प्रेमिलाल चौधरी, तथा थारु आयोगका कार्यवाहक अध्यक्ष सुवोध सिंह थारुसहित थुप्रै विशिष्ट व्यक्तिहरुको उपस्थिति थियो।

गुरही, अथवा गुरिया पर्व, विशेषगरी दाङ, बाँके, बर्दिया, कैलाली र कञ्चनपुर लगायतका थारु बहुल जिल्लाहरूमा हर्षोल्लासपूर्वक मनाइने परम्परागत पर्व हो। यस अवसरमा गाउँका युवतीहरूले पुराना कपडाबाट ‘गुड़िया’ बनाउने चलन छ। साँझपख खुला स्थानमा भेला भई युवतीहरूले ती गुड़िया भुइँमा राख्छन् र युवाहरूले लाठी वा सजाइएको कोर्राको सहायताले तीमाथि प्रहार गर्दछन्। सो पश्चात् युवतीहरूले सहभागी युवाहरूलाई चना लगायत विभिन्न मीठा परिकार बाँड्ने परम्परा रहेको छ।

कार्यक्रमको संयोजन अग्रासन थारु महिला समूहकी अध्यक्ष चम्पा चौधरीले गरेकी थिइन्।