युवान्तिका कुलुङको आरोप: 'विद्या भण्डारीको कार्यक्रममा सहभागी भएकै कारण संगठनको कारबाहीको शिकार भएँ'

काठमाडौं — राष्ट्रिय युवा संघ नेपालकी निलम्बित केन्द्रीय सदस्य युवान्तिका कुलुङले आफूमाथि राजनीतिक प्रतिशोध स्वरूप कारबाही गरिएको आरोप लगाएकी छन्। पूर्वराष्ट्रपति विद्यादेवी भण्डारीको पत्रकार सम्मेलनमा सहभागी भएको भोलिपल्टै आफूलाई संगठनबाट कारबाही गरिएको उनले बताइन्।

उनका अनुसार, आफूले स्पष्टिकरण बुझाइसकेपछि मात्रै राति ९ बजे कारबाहीको पत्र थमाइएको थियो। “विद्यादेवी भण्डारीको प्रेस मिटमा गएको दिनमै मलाई कारबाही पत्र आयो। नागरिकताको विषय उठाएर समेत मेरो चरित्र हत्या गर्न खोजिएको छ,” काठमाडौंमा आयोजित पत्रकार सम्मेलनमा उनले भनिन्।

कुलुङ राष्ट्रिय युवा संघको १०औँ महाधिवेशनबाट खुला महिला सचिवालय सदस्यमा सुमन पुरीको प्यानलबाट विजयी भएकी थिइन्। सोही प्यानलबाट निर्वाचित भएकै कारण आफू षड्यन्त्रको सिकार बन्नुपरेको उनको आरोप छ।

उनले आफूमाथि आर्थिक अनियमितताको झूठा आरोप लगाइएको बताउँदै त्यसका प्रमाण पेश गर्न चुनौती दिइन्। “मेरो खातामा कसैले पैसा पठाएको हो भने, कागज गरेर दिएको हो भने त्यसको प्रमाण देखाउनुहोस्,” कुलुङले भनिन्।

उनको दाबी छ, योजनाबद्ध ढंगले आफूमाथि प्रोपोगाण्डा फैलाएर राजनीतिक भविष्य समाप्त पार्ने प्रयास भइरहेको छ।