विद्यालय शिक्षा ऐनमा नेविसंघको सक्रियता सराहनीय : समिति सभापति थापा

काठमाडौं, । प्रतिनिधिसभाअन्तर्गतको शिक्षा समितिका सभापति अम्मरबहादुर थापाले विद्यालय शिक्षा ऐन ल्याउन नेपाल विद्यार्थी संघ (नेविसंघ)ले खेलेको भूमिकाको प्रशंसा गरेका छन्।

शिक्षक नियुक्तिलाई शतप्रतिशत खुला प्रतिस्पर्धात्मक प्रक्रियाबाट मात्र गर्नुपर्ने माग राख्दै आएको नेविसंघको अडानप्रति समर्थन जनाउँदै सभापति थापाले त्यसले ऐन निर्माणमा सकारात्मक दबाब सिर्जना गरेको बताए। उनले उक्त विद्येयक चाँडै संसदबाट पारित हुने विश्वास व्यक्त गर्दै नेपाली कांग्रेस सभापति शेरबहादुर देउवाको सहयोग अपेक्षित रहेको जनाए।

नेविसंघका अध्यक्ष दुजाङ शेर्पाले विद्यालय शिक्षा सम्बन्धी विद्येयक ५० वर्षपछि संसद्मा प्रस्तुत हुन लागेको सन्दर्भमा त्यसलाई विद्यार्थीमैत्री बनाउन संघ अन्तर्गतका विभिन्न समिति र इकाइहरुले स्वतःस्फूर्त रूपमा आन्दोलन गरिरहेको जानकारी दिए।

सरकार र सरोकारवालामाथि जनदबाब सिर्जना गर्दै आएको नेविसंघले विद्यालय शिक्षा ऐन यथाशीघ्र जारी हुनुपर्ने र शिक्षक नियुक्ति प्रक्रियामा पूर्ण रूपमा खुला प्रतिस्पर्धा सुनिश्चित गरिनुपर्नेमा अडिग रहेको स्पष्ट पारेको छ।